കൊഴുപ്പിന്റെ അളവിൽ ഏറ്റക്കുറച്ചിലോടെ പലവിധം പാൽ കടയിൽ കാണാം. കൊഴുപ്പില്ലാത്തത്, കൊഴുപ്പ് കുറഞ്ഞത്, കൊഴുപ്പു നീക്കം ചെയ്യാത്തത് എന്നിങ്ങനെ.  ഇവയിൽ ആരോഗ്യകരമായ ഓപ്ഷൻ ഏതാണ്?   കുട്ടികൾക്കു ഫുൾ ഫാറ്റ്മിൽക്ക് എടുക്കാം, എന്നാൽ മുതിർന്നവരോ?  കൊഴുപ്പ്  അടങ്ങിയത് ഹൃദ്രോഗമുണ്ടാക്കുമെന്നാണ് നാം കരുതുന്നത്.

എന്നാൽ ടഫ്റ്റ്സ് സർവകലാശാലയിലെ കാർഡിയോളജിസ്റ്റും മെഡിസിൻ പ്രൊഫസറുമായ ഡോ. മൊസാഫറിയൻ   പറയുന്നത്  പാൽ ഉത്പന്നങ്ങള സംബന്ധിച്ച നിലവിലെ മാർഗ്ഗനിർദ്ദേശം 1980കളിൽ രൂപപ്പെട്ടതാണെന്നാണ് . അതിനുശേഷം, നടന്ന  മിക്ക പഠനങ്ങളിലും  കൊഴുപ്പ് കുറഞ്ഞ പാലിന് പ്രത്യേക പ്രയോജനങ്ങൾ ഉള്ളതായി കണ്ടെത്തിയിട്ടില്ല എന്നതാണ് യാഥാർത്ഥ്യം. ഇവിടെ കൊഴുപ്പിന്റെ അളവിനേക്കാൾ പ്രധാനം, തിരഞ്ഞെടുക്കുന്ന പാലുൽപ്പന്നം ഏതാണ് എന്നതാണ്. കൊഴുപ്പ് കുറഞ്ഞതോ പൂർണ്ണ കൊഴുപ്പുള്ളതോ ആയ തൈര്, ചീസ് അല്ലെങ്കിൽ പാൽ എന്നിവയാണോ എന്നു പരിഗണിക്കാതെയാണ് പഠനം നടത്തിയത്. അതിൽ നിന്നും, കൊഴുപ്പ് നിറഞ്ഞ പാലുൽപ്പന്നങ്ങളിൽ കലോറി കൂടുതലാണെങ്കിലും, അവ കഴിക്കുന്നവർക്ക് ശരീരഭാരം കൂടാൻ സാധ്യതയില്ലെന്ന് കണ്ടെത്തി.

ഉദാഹരണത്തിന്, 2018-ൽ പ്രസിദ്ധീകരിച്ച ഒരു പഠനത്തിൽ, ഗവേഷകർ 21 രാജ്യങ്ങളിൽ നിന്നുള്ള 136,000 മുതിർന്നവരെ ഒമ്പത് വർഷത്തേക്ക് നിരീക്ഷിച്ചു. പഠനകാലയളവിൽ, പ്രതിദിനം രണ്ടോ അതിലധികമോ പാൽ ഉത്പന്നങ്ങൾ കഴിക്കുന്നവർക്ക് ഹൃദയസംബന്ധമായ അസുഖങ്ങൾ വരാനുള്ള സാധ്യത 22 ശതമാനം കുറവാണെന്നും പാൽ ഉത്പന്നങ്ങൾ റി കഴിക്കാത്തവരെ അപേക്ഷിച്ച് മരിക്കാനുള്ള സാധ്യത 17 ശതമാനം കുറവാണെന്നും അവർ കണ്ടെത്തി.

പാൽ ഉത്പന്നങ്ങളിൽ  നിന്ന് ഉയർന്ന അളവിൽ പൂരിത കൊഴുപ്പ്  (സാച്ചുറേറ്റഡ് ഫാറ്റ്) കഴിക്കുന്നതു കൊണ്ട് മാത്രം ഹൃദ്രോഗം വരാനുള്ള  സാധ്യതയില്ല എന്നതും ഇവിടെ ശ്രദ്ധേയമാണ്. ഇതു വളരെ ശ്രദ്ധേയമായ കണ്ടെത്തലാണ്. മറ്റൊരു പഠനത്തിൽ രക്തത്തിൽ പാലുൽപ്പന്നങ്ങളുടെ അളവ് കൂടുതലുള്ളവർക്ക് ടൈപ്പ് 2 പ്രമേഹം വരാനുള്ള സാധ്യത 29 ശതമാനം കുറവാണെന്ന് കണ്ടെത്തി.

ഹ്രസ്വകാല പരീക്ഷണങ്ങൾ കാണിക്കുന്നത്, ഫുൾ ഫാറ്റ് ഡയറി ഉൾപ്പെടെയുള്ള പാലുൽപ്പന്നങ്ങൾ കഴിക്കുന്നത് പങ്കെടുക്കുന്നവരുടെ രക്തസമ്മർദ്ദം കുറയ്ക്കുമ്പോൾത്തന്നെ, ശരീരഭാരം വർദ്ധിപ്പിക്കുകയോ എൽഡിഎൽ കൊളസ്ട്രോളിന്റെ അളവ് വർദ്ധിപ്പിക്കുകയോ ചെയ്തില്ല. അതായത് പാലിലെ  കൊഴുപ്പ് ദോഷകരമല്ലെന്ന് വീണ്ടും പഠനങ്ങൾ സൂചിപ്പിക്കുന്നു. മാത്രവുമല്ല പല കാരണങ്ങൾ കൊണ്ടും പാൽ കഴിക്കുന്നത് ശരീരത്തിനു നല്ലതാണ് എന്നും കാണാം.

തൈരും ചീസും  കുടലിൽ നല്ല ബാക്ടീരിയകളുടെ വളർച്ചയ്ക്ക്   സഹായകരമാണ്. ഹൃദയാരോഗ്യവുമായി ബന്ധപ്പെട്ട വിറ്റാമിൻ കെ ഉൾപ്പെടെ ദഹനപ്രക്രിയയിൽ ഉണ്ടാക്കുന്ന മറ്റ് ഗുണകരമായ തന്മാത്രകളും അവയിൽ അടങ്ങിയിട്ടുണ്ട്. ഫുൾ ഫാറ്റ് ചീസുകൾ രക്തത്തിലേക്ക് കൊഴുപ്പ് ക്രമേണ ആഗിരണം ചെയ്യപ്പെടുന്നതിനാൽ കൂടുതൽ നേരം വിശപ്പ് അനുഭവപ്പെടാതിരിക്കാനും സഹായിക്കും.

പുതിയ ഡയറി ഫാറ്റ് ഡാറ്റയെ അടിസ്ഥാനമാക്കി, ഒന്നോ രണ്ടോ തവണ  ഫുൾ ഫാറ്റ് പാൽ, തൈര് അല്ലെങ്കിൽ ചീസ് എന്നിവ ഉപയോഗിക്കുന്നതിൽ ദോഷമില്ല. പ്രതിദിനം കുറഞ്ഞത് ഒന്നോ രണ്ടോ തവണ ഭക്ഷണത്തിൽ തൈരും  ചീസും ഉൾപ്പെടുത്താൻ ഗവേഷകർ പറയുന്നു. അതായത് വ്യക്തികൾക്ക് അവരവർക്ക് ഇഷ്ടമുള്ള അളവു കൊഴുപ്പ് അടങ്ങിയ പാൽ ഉത്പന്നങ്ങൾ തിരഞ്ഞെടുക്കാം എന്നർത്ഥം. പാലിലെ സ്വാഭാവിക കൊഴുപ്പുകൾ നീക്കം ചെയ്യുമ്പോൾ, വിറ്റാമിനുകൾ എ, ഡി തുടങ്ങിയ ചില വിറ്റാമിനുകളും നഷ്ടപ്പെടും.

എന്നാൽ പാലിൽ നിന്നുള്ള വെണ്ണയും ക്രീമും രക്തത്തിലെ കൊളസ്ട്രോളിന്റെ അളവ് വർദ്ധിപ്പിക്കുന്നതിനാൽ, ഉയർന്ന കൊളസ്ട്രോൾ ഉണ്ടെങ്കിൽ അവ പരിമിതപ്പെടുത്താൻ ഗവേഷകർ ശുപാർശ ചെയ്യുന്നു. രക്തത്തിൽ കൊളസ്ട്രോൾ നില ഉയർന്നതാണെങ്കിൽ, ഡയറി തിരഞ്ഞെടുപ്പുകൾ ഡോക്ടറുമായി ചർച്ച ചെയ്തു തീരുമാനിക്കുന്നതാവും നല്ലത്.